NGUVU YA MAFUTA YA MIZEITUNI

JUMANNE

 01/APRIL/2014

SOMO:

NGUVU YA MAFUTA YANAVYOWEZA KUMALIZA UMASKINI YAKIWA KATIKA MIKONO YA NABII

Na:Nabii Frank Julius Kilawah.

Neno MIZEITUNI linamaanisha ni mti wa upako,Neno UPAKO linamaanisha kuna kitu au kuna kimiminika au ni nguvu inayovutia si ndani yako bali inakua juu yako inakufunika.

Tafsiri ya pili ya neno MIZEITUNI ni  MEMSHAKI,tafsiri ya neno  MEMSHAKI ni nguvu ambayo inakwenda zaidi ya mipaka uliyowekewa,Pia mafuta haya ndiyo yaliyokuwepo hapo awali kabla hayajawa mmea na kuitwa Mizeituni.

MEMSHAKI ni mafuta ya kwanza ambayo Mungu alimmiminia aliyekuwa Malaika wa Sifa huko Mbinguni, aliyejulikana kwa jina la LUSIFA , ni Malaika pekee wa Mbinguni aliyemiminiwa mafuta hayo na kazi kubwa ya haya mafuta ni kukifanya kitu kiende zaidi ya mipaka yake.

Ikiwa asili ya Mizeituni ni Memshaki,na kazi ya haya Mafuta ni Kwenda zaidi ya mipaka,ndio maana watumishi wa Mungu hutumia mafuta haya ili kuwavusha watu zaidi ya mipaka yao ya Kiuchumi, Kiafya,Kielimu,Ndoa na Mafanikio ya kila aina, kwa maana mafuta haya yakiwa na neno la Nabii ndani yake yanakuwa na nguvu ya Mungu.

Tukiangalia katika maandiko matakatifu tunamuona mwanamke mmoja miongoni mwa wake za wana wa Manabii, alivyomlilia Nabii Elisha kutokana na tatizo lililokuwa linamkabili la kutokuwa na fedha,hivyo  kutakiwa kulipa deni  kwa kuwatoa wanawe wawili wakawe watumwa.

Mwanamke huyu alitumia mafuta kumaliza shida ya fedha  iliyokuwa inamkabili,2WAFALME 4:2 Elisha akamwambia,Nikufanyie nini?Niambie;una kitu gani nyumbani?Akasema,Mimi mjakazi wako sina kitu nyumbani ,ila chupa ya mafuta .

Ukiendelea  kusoma  andiko hili katika ule mstari wa saba, tunaona jinsi mafuta yalivyotumika kulipa deni na yaliyobaki aliyatumia kwa ajili ya kutengeneza utajiri kama maandiko yanavyosema katika 2WAFALME 4: 7 “Ndipo akaja akamwambia Yule mtu wa Mungu.Naye akasema,Enenda ukayauze mafuta haya,uilipe deni yako;nayo yaliyosalia uyatumie wewe na watoto wako”.

Katika ule mstari wa sita maandiko yanasema mafuta yalikoma,hii haimaanishi mafuta yaliisha,tafsiri ya neno ni sawa na mfano wa bomba la maji,unapokinga maji ndoo ikijaa haimaanishi maji yameisha bali  ulipata kiwango ulichokihitaji kwa wakati huo

Andiko hili linatuonyesha namna mafuta yanavyoweza kutumika kama njia ya kukuondolea umaskini na kukupatia fedha, ndio maana Watumishi wengi wa Mungu hasa Manabii hutumia mafuta kwa ajili ya kuwafungua watu katika  matatizo mbalimbali yakiwemo ya Kiuchumi .

 Ukiangalia wakati wa Daudi,mara baada ya kupakwa mafuta na kuwekwa wakfu kuwa Mfalme kuna kitu kilibadilika ndani yake,Masikio ya Daudi  yalifunguka na kuanza kusikia sauti ya Mungu hivyo kupata ujasiri wa kupambana na Goliati kwa maana kwa kupakwa MAFUTA akajitambua kuwa ana nguvu kubwa ya Mungu   ndani yake.

Daudi ambaye alikuwa akichunga Mbuzi za Baba yake kabla ya kupakwa mafuta Masikio yake yalikuwa yakisikia sauti za Mbuzi ,Ng’ombe na Punda machungioni, lakini mara baada ya kupakwa mafuta aliaminika hadi kufikia hatua ya kupelekwa vitani, kwa maana waliitambua nguvu ya Mungu iliyokuwamo ndani yake kutokana na  MAFUTA aliyopakwa.

Baada ya kupakwa mafuta Daudi aliishi kama Nabii, kwa maana macho yake ya ndani yaliona na alielewa kuwa Yesu ni Jiwe Kuu la pembeni  ndio maana alikwenda kupambana na GOLIATI kwa Jiwe kwa kutambua kuwa jiwe la pembeni halitambakisha GOLIATI salama.

Kazi ya mafuta ya upako ni kwa ajili ya kubadilisha jina na mfumo wako maisha,ili watu waliokuzoea kukuona  kuwa wewe ni wa kiwango cha chini,washangae kuona namna Mungu anavyokuinua katikati yao.

Mkilielewa somo hili nawahakikishia kwamba hapa duniani hamtakuwa ombaomba, siwafundishi ili mbaki maskini, nataka muitambue nguvu ya mafuta ili mnapowekwa wakfu muipokee nguvu hiyo kwa imani kuu na maisha yenu yakapate kubadilika katika nyanja zote.